Qeveria ka vendosur datën 31 korrik si afatin përfundimtar për lirimin vullnetar të hapësirave publike të zëna përgjatë akseve kombëtare, të cilat përbëjnë rrezik për sigurinë rrugore.
Një ditë para përfundimit të afatit, ministrja e Infrastrukturës, Belinda Balluku, deklaroi se pas kësaj date do të ketë penalizime për subjektet që refuzojnë të lirojnë hapësirën e zënë në mënyrë të paligjshme.
Strukturat e IKMT dhe IMT janë në terren për të konstatuar shkeljet dhe për të marrë masat e nevojshme pas përfundimit të afatit, bëri me dije ministrja Balluku pasditen e sotme.
Balluku: Jemi në terren për reformën e rikthimit të ligjshmërisë të territorit të Shqipërisë për sa i përket edhe sigurisë rrugore, hapësirës publike e cila duhet liruar tashmë. I kemi bërë thirrje të gjithë subjekteve dhe bizneseve që ndodhen në zonat e akseve kombëtare për të marrë masa dhe për të liruar hapësirat që janë shkelur në shumë rase. Sidomos në rastet e varrezave të makinave.
Duhet të qëndrojnë 1 km larg rrugës ndërkombëtare. Janë marrë disa aksione që s’kanë pasur rezultat. Por ne kemi lënë një afat. Deri më 31 korrik me vullnet të plotë të gjithë subjektet duhet të lëvizin nga pjesët ku kanë bllokuar pjesët e rrugës dhe akset kombëtare. Ne bëjmë thirrje për të gjithë subjektet që ta bëjnë këtë punë me vullnet dhe pa ndërhyrjen e IMT, por IKMT është në terren për të konstatuar shkeljet. Këto raste janë të patolerueshme dhe do të ketë ndërhyrje të menjëhershme. Duhet të ketë një bashkëpunim të plotë që ne mos të kalojmë në akte të cilat do të na duhet të përdoren thjesht dhe vetëm për të respektuar ligjin.
