UEFA ka hedhur poshtë ankesën e Barcelonës lidhur me atë që klubi katalanas e cilësoi si “mungesë të rëndë ndërhyrjeje nga VAR-i” në humbjen 2-0 ndaj Atletico Madrid në ndeshjen e parë çerekfinale të Champions League.
Organizmi europian e ka shpallur protestën e Barcelonës si “të papranueshme”, duke mos i dhënë vijim kërkesës së klubit për hetim mbi episodin e diskutueshëm.
Rasti që shkaktoi reagimin e Barcelonës ndodhi në minutën e 54-t, kur mbrojtësi i Atletico, Marc Pubill, preku topin me dorë brenda zonës. Episodi ndodhi pasi portieri Juan Musso dukej se kishte rifilluar lojën me goditje nga porta.
Lojtarët e Barcelonës kërkuan penallti, por arbitri Istvan Kovacs lejoi vazhdimin e lojës, ndërsa arbitri i VAR-it, Christian Dingert, nuk ndërhyri.
Në reagimin e saj zyrtar, Barcelona theksoi se arbitrarhi nuk respektoi rregulloren në fuqi dhe se ky vendim ndikoi drejtpërdrejt në rrjedhën e ndeshjes dhe në rezultat. Klubi e quajti rastin një “gabim të madh” dhe kërkoi hapjen e një hetimi.
Megjithatë, UEFA bëri të ditur të martën se Trupa e Kontrollit, Etikës dhe Disiplinës e kishte shpallur protestën të papranueshme.
Të dy skuadrat do të përballen sërish në ndeshjen e kthimit në stadiumin “Riyadh Air Metropolitano”, me Atletico Madrid që mban avantazhin 2-0 nga takimi i parë, pas fitores së parë të skuadrës madrilene në fushën e Barcelonës që nga viti 2006.
