Pozitat e Gianni Infantinos në krye të FIFA-s janë dobësuar ndjeshëm pas dështimit të projektit për t’u shitur investitorëve privatë një pjesë e të drejtave komerciale të Kupës së Botës.
Sipas “Sky News”, UEFA po përshpejton përpjekjet për të gjetur një mënyrë që Infantino të mos vazhdojë më në drejtimin e FIFA-s. Besimi ndaj tij është tronditur rëndë, ndërsa presidenti i UEFA-s, Aleksander Ceferin, u ka kërkuar federatave të tërheqin mbështetjen për rizgjedhjen e tij.
UEFA po shqyrton edhe mundësinë e thirrjes së një kongresi të jashtëzakonshëm të FIFA-s. Për ta realizuar këtë nevojitet mbështetja e të paktën 43 prej 211 federatave anëtare, përpara një votëbesimi të mundshëm.
Presioni është shtuar edhe nga dorëheqjet e disa drejtuesve të lartë brenda FIFA-s, ndërsa kanë nisur diskutimet për kandidatët që mund ta sfidojnë Infantinon në të ardhmen.
