Sekretari i Përgjithshëm i Partisë Demokratike, Flamur Noka ka reaguar pasi Policia e Shtetit nisi hetimet ndaj tij lidhur me incidentin e regjistruar paraditen e kësaj të diele ku në një nga qendrat e votimit në Vorë u konfliktua me Bert Xhabafti.
Në llogarinë e tij në “Facebook”, Noka vijon t’i qëndrojë denoncimit të tij duke theksuar sërish se njëri nga personat me të cilët u përball këtë të diel është Xhoni Asllanaj, nipi dhe shoferi i Xhabaftit, i cili vite më parë është ndaluar nga blutë pasi akuzohej për vjedhje dhe armëmbajtje pa leje. Madje, deputeti demokrat thotë se së bashku me të u arrestua edhe vetë Xhabafti.
“Ftoj të gjithë qytetarët të shikojnë në faqen time videolajmin e arrestimit nga policia të shtetasit Xhoni Asllanaj, me të cilin sot u përballa në qendrën e votimit në #Vorë. Xhoni Asllanaj është nipi dhe shoferi i Albert Xhabaftit të Vorës dhe është i skeduar për vjedhje dhe armëmbajtje pa leje. Në videolajmin e Report TV-së vite më parë përmendet se Asllanaj u ndalua së bashku me dy persona të tjerë, ku një prej tyre me inicialet A.K, 44 vjeç. A.K është Albert Xhabafti dora vetë”, shkruan Noka.
Teksa më tej këtë denoncim, deputeti demokrat e ka shoqëruar edhe me një foto duke pretenduar se automjeti me të cilin Allanaj dhe Xhabafti janë arrestuar vite më parë qëndron i parkuar në oborrin e tyre.
Njoftimi i plotë:
Sot jam proceduar penalisht me akuzën e veprës penale “Kanosja/dhunimi ndaj pjesëmarrësve në zgjedhje”.
Ftoj të gjithë qytetarët të shikojnë në faqen time videolajmin e arrestimit nga policia të shtetasit Xhoni Asllanaj, me të cilin sot u përballa në qendrën e votimit në #Vorë!
Xhoni Asllanaj është nipi dhe shoferi i Albert Xhabaftit të Vorës dhe është i skeduar për vjedhje dhe armëmbajtje pa leje.
Në videolajmin e Report TV-së vite më parë përmendet se Asllanaj u ndalua së bashku me dy persona të tjerë, ku një prej tyre me inicialet A.K, 44 vjeç. A.K është Albert Xhabafti dora vetë.
Kjo fuoristradë që shihni në foton e bashkëlidhur ndodhet sot në oborrin e tij. #Policia e ushtarit të krimit #Proda, e nënshtruar nën urdhërat e Albert Xhabaftit, procedon penalisht Sekretarin e Përgjithshëm të Partisë Demeokratike, Flamur Nokën, pse ky i fundit kërkoi që Albert Xhabafti dhe nipi e shoferi i tij të largoheshin nga qendra e votimit.
Të nderuar qytetarë! Ju ftoj të mos bini pre e keqinformimit dhe propagandës së mediave që paguhen nga kompania e inceneratorëve! Policia e Shtetit e komanduar nga banditi Proda, ndonëse e njeh mirë skedën e Xhoni Asllanajt, e cilëson si “qytetari që u pengua” në qendrën e votimit, sepse ashtu i leverdis partisë që po humbet pushtetin.
Fitorja mbi pushtetet e kapura dhe të kalbura do të jetë e qytetarëve të vërtetë!
