Enea Thomarai, 26 vjeçari që mbeti i plagosur pas shpërthimit të tritolit në shtëpinë e motrave Nikolli ka ndërruar jetë në spitalin e Traumës.
Në 14 korrik në katin e katërt të banesës ku jetonin me qira motrat Nikolli në lagjen “Haxhias” shpërtheu një sasi lëndës plasëse. I riu mbeti aksidentalisht i plagosur, pasi ishte duke shkuar në tualet kur u godit nga dera e banesës për shkak të shpërthimit.
Objektiv i atentatit ishin dy motrat Alda dhe Xhovana Nikolli që jetonin me qera në lagjen “Haxhias”. Tritoli ishte vendosur në koridorin e katit të katërt të pallatit në derën e hyrjes në pronësi të një 59-vjeçari, ku jetonin motrat Nikolli, të cilat akuzuan Nuredin Dumanin si porositës të vendosjes së tritolit.
Xhovana Nikolli është e dashura e Amarildo Nikolli (Xhanej), i cili dyshohet si vrasës me pagesë. E reja nga Lezha, e cila është personazh i njohur në rrjetet sociale, në një video të publikuar tregonte se kishte përplasje me të dashurën e Nuredin Dumani, i cili është kthyer në të penduar të drejtësisë.
Në video, ajo përmend Nuredin Dumanin dhe i bënte thirrje që të ‘mbante’ dashnoren e tij duke u shprehur se kishte probleme serioze me të.
“O Nuredin Dumani të bëj thirrje të mbash cik atë dashnoren tate ti, se po ta kapa kund nëpër Itali ore Nuredin Dumani…se ke idenë çfarë mund t’i bëj se më njeh mirë. A mirë? Mirë shpirti vogël, ik të përshëndes Nuredin Dumani. Shihemi pas 2 ditësh”, shprehej Xhovana./ilirianews
