Një aksident i rëndë rrugor ka ndodhur sot rreth orës 13:35, në aksin nacional Vlorë–Fier, pranë një karburanti në zonën e njohur si “ELDA”.
Sipas informacioneve paraprake, një motomjet i tipit Piaggio me targa AK653 ka dalë nga rruga pasi drejtuesi i tij ka humbur kontrollin për shkaqe ende të panjohura. Mjeti është përplasur fillimisht me një shtyllë elektrike dhe më pas me një shtyllë tjetër druri, duke shkaktuar dëme të konsiderueshme materiale dhe pasoja të rënda për personat në mjet.
Si pasojë e aksidentit, të dy personat që ndodheshin në motomjet kanë pësuar lëndime të rënda. Ata janë transportuar me urgjencë drejt Spitalit Rajonal të Vlorës për ndihmë mjekësore. Fatkeqësisht, njëri prej tyre L. Ll., 19-vjeç ka ndërruar jetë në spital si pasojë e plagëve të marra, ndërsa tjetri T. M., po 19-vjeç ndodhet në gjendje kritike, nën kujdesin intensiv të mjekëve.
Në vendngjarje kanë mbërritur menjëherë forcat e policisë rrugore dhe grupi hetimor, të cilët kanë nisur hetimet për të zbardhur rrethanat e plota të ngjarjes dhe për të përcaktuar shkaqet që çuan në humbjen e kontrollit të mjetit.
Policia po punon gjithashtu për identifikimin e viktimës dhe të të plagosurit.
