Policia italiane ka arrestuar dy shqiptarë, të moshës 23 dhe 29 vjeç, të kapur duke shitur doza kokaine te dy blerës italianë, përkatësisht në Treviso dhe Silea.
Bëhet me dije se, në momentin e arrestimit, dy shqiptarëve iu gjetën 60 gramë kokainë dhe 20 mijë euro para të gatshme.
Arrestimi i parë ka të bëjë me një 23-vjeçar shqiptar, i cili u kap në automjetin e tij në Via delle Marie, në Treviso, ndërsa po i shiste një dozë kokaine një blerësi për 60 euro. Një kontroll i mëvonshëm çoi në sekuestrimin e shumës së marrë nga blerësi dhe zbulimin e një ene metalike të pajisur me magnet, e fshehur nën automjetin që ai drejtonte. Brenda saj u gjetën 34 doza kokaine, gati për shitje me pakicë.
Operacioni, i cili u shtri edhe në banesën e të arrestuarit, çoi gjithashtu në sekuestrimin e 16 mijë eurove, të fshehura në një mbulesë jastëku divani.
Po atë ditë, u arrestua edhe një shtetas shqiptar 29 vjeç. Ai u kap në automjetin e tij në Via Treviso, në Silea (TV), ndërsa po i shiste pesë doza kokaine një blerësi italian për 300 euro. Gjatë kontrollit policor u zbulua, përveç shumës së parave të dorëzuara nga blerësi, edhe një enë metalike me magnet, e fshehur nën automjetin që ai drejtonte. Ena përmbante 23 doza kokaine, gati për shitje me pakicë.
Hetimi, i cili u shtri edhe në banesën e 29-vjeçarit, çoi në sekuestrimin e 4 mijë eurove.
Pas arrestimit, dy shqiptarët iu dorëzuan autoriteteve gjyqësore, të cilat, pas një gjykimi të shkurtuar, i dënuan përkatësisht me 8 dhe 11 muaj burg.
