Hetimet lidhur me gjetjen e një shqiptari brenda një stalle në Kalamata të Greqisë kanë marrë një kthesë të papritur.
Fillimisht u raportua se viktima, 44 vjeç, identiteti i të cilit ende nuk është bërë publik për media, dyshohej se ishte vrarë nga punëtori i tij. Mirëpo, sipas pistave të reja, dyshohet se shqiptari mund të ketë kryer vetëvrasje, siç raporton Protothema.
Viktima jetonte prej pak kohësh në banesën e një shqiptari. Trupi u gjet nga vajza e pronarit dhe partneri i saj. Arma me të cilën ka ndodhur ngjarja ishte fshehur nga çifti jo shumë larg vendngjarjes, me pretendimin se u frikësuan dhe për të mos u akuzuar, pasi arma i përkiste pronarit të stallës. Pasi u fsheh arma, ata njoftuan autoritetet për ngjarjen.
Sipas medias greke Protothema, një person i afërt me 44-vjeçarin është shprehur për uniformat blu se viktima kishte deklaruar dikur se kishte ndërmend t’i jepte fund jetës së tij.
Sakaq, hetimet vijojnë për përcaktimin e saktë të shkakut të vdekjes së 44-vjeçarit dhe zbardhjen e plotë të ngjarjes.
