Turqia ka ndërmarrë masa të ashpra ndaj Izraelit, duke reaguar ndaj ofensivës izraelite në Gaza me kufizime të reja diplomatike dhe ekonomike. Gjatë një seance parlamentar, Ministri i Jashtëm turk, Hakan Fidan, njoftoi se Ankaraja ka ndaluar hyrjen e anijeve izraelite në portet turke dhe gjithashtu ka ndaluar anijet me flamur turk që të përdorin portet izraelite.
Një prej masave kyçe është edhe kufizimi i hapësirës ajrore turke për avionët që lidheshin me Izraelin, duke përfshirë ndalimin e fluturimeve që transportojnë armë dhe municione destino drejt shtetit hebre. Fidan theksoi se “ne e kemi ndërprerë plotësisht tregtinë me Izraelin” dhe se Turqia nuk do të lejojë as anije që transportojnë armë të hyjnë në portet e saj.
Qeveria turke ka qenë një ndër kritikët më të zëshëm të aksioneve ushtarake izraelite në Gaza, duke i përcaktuar ato si gjenocid, një akuzë që Izraeli e ka mohuar vazhdimisht. Në përgjigje, Ankara ka pezulluar të gjitha marrëdhëniet tregtare me Izraelin dhe ka bërë thirrje për veprime ndërkombëtare urgente, duke kërkuar që fuqitë e mëdha të ndalojnë mbështetje ndaj shtetit izraelit.
Sipas agjencisë Reuters, autoritetet portuale turke kishin kërkuar për disa javë deklarata zyrtare nga anijet që ndalonin në portet e tyre, për të konfirmuar se ato nuk ishin të lidhura me Izraelin dhe nuk transportonin mallra ushtarake.
Këto veprime theksojnë një përkeqësim të marrëdhënieve mes Ankarasë dhe Tel Avivit, duke reflektuar tensionet në rritje në rajon. Reagimi i Turqisë vjen në një kohë ku konflikti në Gaza ka shkaktuar shqetësim të gjerë ndërkombëtar dhe ka nxitur protesta të vazhdueshme në vendet muslimane, përfshirë Turqinë, e cila ka shprehur solidaritet me palestinezët.
