Që prej mëngjesit të sotëm në mediat shqiptare qarkulloi me shpejtësi lajmi se vajza e presidentit të SHBA-së, Ivanka Trump, ndodhej në qytetin bregdetar të Vlorë.
Sipas asaj që u raportua fillimisht, u tha se prej mbrëmjes të së shtunës ajo ishte akomoduar në vilat qeveritare në Vlorë, ndërsa mëngjesin e sotëm ishte parë duke u drejtuar drejt zonës së Zvernecit. Madje, në rrjetet sociale qarkulluan edhe video ku pretendohej se “biondja” e filmuar ishte pikërisht Ivanka Trump.
Mirëpo, siç u vu re edhe nga verifikimi i pamjeve, asnjëra prej grave të shfaqura në video nuk i ngjan Ivanka Trump, duke hedhur dyshime të forta mbi vërtetësinë e lajmit.
Tashmë është konfirmuar se lajmi për praninë e saj në Shqipëri është i pavërtetë. Sipas informacioneve të siguruara, në vilat qeveritare nuk ka qenë e akomoduar Ivanka Trump, por disa persona të afërt me projektet e saj, kryesisht arkitektë dhe pjesë e një grupi pune që lidhet me zhvillimin e Ishulli i Sazanit.
Bëhet me dije se këta persona kanë vizituar fillimisht Lagunën e Nartës dhe më pas janë larguar drejt Dhërmiut.
Në përfundim, konfirmohet se Ivanka Trump nuk ka qenë në Vlorë, ndërsa lajmi i përhapur që prej mbrëmjes së djeshme rezulton të ketë qenë i rremë.
