Tunizia ka ndërprerë bashkëpunimin me trajnerin Sabri Lamouchi pas humbjes së rëndë 5-1 ndaj Suedisë në ndeshjen e parë të Grupit F në Botërorin 2026.
Federata Tuniziane e Futbollit konfirmoi se kontrata e trajnerit francez është mbyllur me “marrëveshje të ndërsjellë”, ndërsa në vend të tij është emëruar Hervé Renard, i cili do ta drejtojë skuadrën deri në fund të turneut.
Lamouchi bëhet kështu trajneri i parë në historinë e Kupës së Botës që largohet nga detyra pas vetëm një ndeshjeje. 54-vjeçari ishte emëruar në janar dhe qëndroi në krye të Tunizisë vetëm pesë muaj.
Pas humbjes ndaj Suedisë, Lamouchi e cilësoi rezultatin si shumë të dhimbshëm.
“Të nisësh kompeticionin me një humbje kaq të rëndë është e vështirë. Bëmë shumë gabime dhe kjo nuk mund të ndodhë. Po dëmtojmë veten”, u shpreh ai pas ndeshjes.
Në pesë ndeshje si trajner i Tunizisë, Lamouchi fitoi vetëm një herë, ndaj Haitit. Para Botërorit, skuadra kishte humbur edhe miqësoret ndaj Austrisë dhe Belgjikës.
Tunizia do të kërkojë reagim në dy ndeshjet e mbetura të Grupit F, ndaj Japonisë dhe Holandës, tashmë nën drejtimin e Hervé Renard.
