Mungesa e Trent Alexander-Arnold në planet e Anglisë pak para Kupës së Botës 2026 ka qenë një nga surprizat më të mëdha të vendimeve të Thomas Tuchel. Trajneri anglez gjeti kohën për të sqaruar pse mbrojtësi i Real Madridit nuk u përfshi në skuadër përpara miqësores së së premtes ndaj Uruguait, duke pranuar se ky vendim mund të duket “disi i padrejtë”.
Megjithatë, Tuchel theksoi se nuk e ka përjashtuar përfundimisht lojtarin nga Kupa e Botës në SHBA, Meksikë dhe Kanada. “Është thjesht një vendim. Ndoshta një zgjedhje e vështirë dhe, deri diku, edhe e padrejtë”, u shpreh ai, duke u përpjekur të ulë zhurmën rreth mungesës së Trent vetëm dy muaj para shpalljes së listës përfundimtare.
“E di çfarë mund të na japë Trent. Kur lë jashtë një lojtar si ai, krijohet shumë zhurmë. Ne folëm në telefon, ia shpjegova situatën dhe ai duhet ta pranojë”, shtoi Tuchel. Më pas ai sqaroi edhe pse zgjodhi Ben White në vend të mbrojtësit të Real Madridit: “Zgjedhja ra mbi White sepse e pashë në finalen e Kupës së Ligës dhe në ndeshjen e Champions-it, dhe ai ishte rikthyer në nivelin e tij më të mirë. Vendosa të zgjedh lojtarët që kanë qenë me ne në muajt shtator, tetor dhe nëntor.” Sipas raportimeve, dëmtimi i Jarrel Quansah ndikoi gjithashtu në këtë vendim.
Konkurrenca për krahun e djathtë te Anglia mbetet shumë e fortë. Alexander-Arnold nuk ka luajtur për kombëtaren që prej muajit qershor dhe ka munguar në katër grumbullimet e fundit. Që nga ardhja e Tuchel në krye të “Tre Luanëve”, ai ka luajtur vetëm 26 minuta. Nga ana tjetër, mbrojtësi ka qenë titullar në pesë nga shtatë ndeshjet e fundit të Real Madridit dhe është aktivizuar në dhjetë nga njëmbëdhjetë takimet e fundit pas rikthimit nga dëmtimi.
Pas një fillimi të vështirë dhe problemeve fizike që e penguan të fitonte menjëherë një vend në formacionin e Real Madridit, anglezi është shndërruar në një titullar të rregullt nën drejtimin e Álvaro Arbeloas. Megjithatë, kjo nuk i ka mjaftuar për të siguruar një rikthim në kombëtare. Me emra si Jarrel Quansah, Tino Livramento, Djed Spence dhe tani Ben White në garë për të njëjtin pozicion, shanset e Trent për të qenë pjesë e Anglisë në Botëror duken gjithnjë e më të vogla.
