Thomas Tuchel ka përmbysur ekuilibrat te Anglia pas eliminimit dramatik nga Argjentina në gjysmëfinalet e Kupës së Botës. Humbja 2-1 ka lënë pas shumë zemërim, jo vetëm te tifozët, por edhe te ish-lojtarët dhe analistët anglezë, të cilët kanë kritikuar ashpër zgjedhjet e trajnerit gjerman.
Tuchel pranoi hapur se as lojtarët e Anglisë dhe as ata të Francës nuk duan ta luajnë ndeshjen për vendin e tretë, pas zhgënjimit të madh në gjysmëfinale.
“Asnjë nga lojtarët tanë, dhe asnjë nga lojtarët e Francës, nuk dëshiron ta luajë këtë ndeshje”, deklaroi ai për sfidën që do të zhvillohet në Miami.
Por problemi më i madh për Tuchel nuk është ndeshja e vendit të tretë. Sipas mediave angleze, vendimet e tij në fundin e sfidës ndaj Argjentinës lanë të habitur edhe vetë lojtarët e Anglisë. The Telegraph raporton se ndryshimet mbrojtëse, me aktivizimin e Ezri Konsa, Dan Burn dhe Nico O’Reilly për të ruajtur avantazhin 1-0, nuk u kuptuan nga një pjesë e skuadrës.
Edhe kampi argjentinas u surprizua nga qasja e Tuchel. Sipas The Independent, Argjentina kishte pritur që Anglia të fuste në lojë lojtarë të shpejtë si Saka dhe Madueke për të goditur në kundërsulm, por kur kjo nuk ndodhi, skuadra e Lionel Scalonit u shty edhe më përpara.
Statistikat e bëjnë edhe më të fortë kritikën ndaj trajnerit. Nga goli i Anthony Gordon në minutën e 55-të deri te goli vendimtar i Argjentinës në minutën e 92-të, Anglia pati vetëm 12% mbajtje topi dhe realizoi vetëm tre pasime të sakta. Një shifër që ka shtuar edhe më shumë debatin për mënyrën se si Tuchel e menaxhoi avantazhin.
Ish-yje si Jamie Carragher, Wayne Rooney, Gary Lineker, Michael Owen dhe të tjerë kanë qenë shumë kritikë, ndërsa disa zëra kanë kërkuar edhe shkarkimin e tij. Chris Sutton e cilësoi menaxhimin e ndeshjes si “katastrofë taktike”.
Kritikat nuk kanë ardhur vetëm nga Anglia. Edhe Thomas Müller reagoi në rrjetet sociale, duke u shprehur i habitur nga mënyra se si Anglia e luajti pjesën e fundit të ndeshjes.
“Nuk mund ta kuptoj si Anglia e menaxhoi këtë ndeshje pasi ishte në avantazh. Nuk e kuptoj si lejuan Argjentinën të krosonte vazhdimisht nga pozicione perfekte”, shkroi Müller.
Megjithatë, pavarësisht presionit, Tuchel pritet të vazhdojë në krye të Anglisë. Ai ka kontratë deri në Europian dhe vetë trajneri ka deklaruar se dëshiron të vazhdojë.
“Kam kontratë deri në Europianin që do të luhet në shtëpi dhe mezi e pres”, tha Tuchel pas eliminimit.
Sipas The Athletic, kontrata e tij përmbante klauzola që mund të lejonin ndarjen mes palëve nëse Anglia eliminohej para çerekfinaleve. Por duke qenë se “Tre Luanët” arritën deri në gjysmëfinale, këto klauzola nuk aktivizohen.
Megjithatë, hija e Pep Guardiolës është rikthyer. The Athletic raporton se FA kishte pasur një marrëveshje verbale me Guardiolën deri në vitin 2024, përpara se ai të vendoste të rinovonte me Manchester City. Tani që trajneri spanjoll është i lirë pas largimit nga City, emri i tij mund të rikthehet sërish në qendër të diskutimeve.
Për momentin, Tuchel mbetet trajneri i Anglisë, por mënyra e eliminimit nga Argjentina e ka vendosur në një pozitë delikate. Një tjetër paraqitje e dobët ndaj Francës në ndeshjen për vendin e tretë mund ta bëjë emrin e Guardiolës të dëgjohet edhe më fort rreth pankinës së “Tre Luanëve”.
