Në një seancë të fundit të Komitetit për Punë të Jashtme të Dhomës së Përfaqësuesve, administratës së presidentit Donald Trump iu kërkua të rrisë angazhimin ndaj Ballkanit Perëndimor.
Kryetari i Nënkomisionit për Evropën, Keith Self, paralajmëroi se rajoni po përballet me rritje të paqëndrueshmërisë, sidomos pas pushtimit rus të Ukrainës.
Ai e identifikoi Serbinë si një faktor të rëndësishëm destabilizues, ndërsa theksoi se tensionet e vazhdueshme mes Kosovës dhe Serbisë mbeten burimi kryesor i krizës.
Self foli gjithashtu për aktivitetet hibride të rivalëve të SHBA-së, si Rusia dhe Kina, të cilat po shfrytëzojnë situatën për të shtuar ndikimin e tyre në rajon.
Ai vuri në dukje se Kina po përdor lidhjet ekonomike dhe bashkëpunimin ushtarak për të forcuar praninë e saj në Serbi dhe për të përfituar nga nivelet e larta të korrupsionit në Ballkan.
Sipas tij, Ballkani Perëndimor ka qenë “shpesh i neglizhuar” nga politika perëndimore, por mbetet një zonë me potencial për stabilitet dhe zhvillim përmes angazhimit më të fortë amerikan.
Eksperti i menaxhimit të konflikteve, Edward P. Joseph, theksoi se edhe pse nuk ka një aktor të vetëm përgjegjës për tensionet, stabiliteti i rajonit varet nga gatishmëria e Serbisë për të pranuar rendin perëndimor.
Ai kërkoi që SHBA-ja të përcaktojë orientime më të qarta për Beogradin, duke nënvizuar se integrimi euroatlantik është rruga e vetme realiste për Serbinë.
Joseph propozoi që zgjidhja afatgjatë e krizës të përfshijë anëtarësimin në NATO si për Kosovën, ashtu edhe për Serbinë, duke sugjeruar se presidenti Trump mund të luajë rol në ofrimin e një propozimi transformues.
Ai kritikoi qasjen e pabalancuar të SHBA-së ndaj Beogradit dhe Prishtinës, duke theksuar se përgjegjësia për provokime i është adresuar kryesisht vetëm Prishtinës.
