Presidenti amerikan Donald Trump dhe kryeministri izraelit Benjamin Netanyahu zhvilluan një bisedë telefonike të martën pasdite, në kulmin e tensioneve mes Izraelit dhe Iranit, pas shkeljes së raportuar të armëpushimit nga ana e Teheranit.
Sipas mediave izraelite, biseda vjen pasi Trump shprehu publikisht pakënaqësinë e tij për planet e Izraelit për një sulm të mundshëm hakmarrës ndaj Iranit, duke e cilësuar si një veprim që do të minonte marrëveshjen e arritur mes dy vendeve.
Burime pranë qeverisë izraelite nuk e përjashtojnë mundësinë e një sulmi “simbolik”, megjithatë pas telefonatës me Netanyahun, Trump u shpreh qartë:
“Izraeli nuk do ta sulmojë Iranin. Të gjithë avionët izraelitë do të kthehen në atdheun e tyre”, deklaroi presidenti amerikan përmes një postimi në rrjetin e tij Truth Social.
Deklarata e Trump vjen në një moment kritik, ku ndërhyrja diplomatike shihet si kyç për të shmangur një përshkallëzim të mëtejshëm të konfliktit në Lindjen e Mesme.
