Presidenti i Shteteve të Bashkuara, Donald Trump, ka minimizuar frikën për një përshkallëzim të mëtejshëm të konfliktit tregtar me Kinën, duke lënë të kuptohet se SHBA disponon një fuqi të jashtëzakonshme që shkon përtej tarifave.
Gjatë një deklarate nga Zyra Ovale të mërkurën, Trump tha se nuk është aspak i shqetësuar për përplasjen ekonomike me Pekinin dhe u shpreh me respekt për homologun e tij kinez, Xi Jinping, duke e cilësuar atë si “një nga njerëzit më të mençur në botë”.
“Nuk mendoj se do ta lejonte një përshkallëzim të tillë,” tha Trump, ndërsa siguroi se Shtetet e Bashkuara zotërojnë mjete të jashtëzakonshme force. “Ne kemi armë që askush nuk e imagjinon. Janë armët më të fuqishme që ekzistojnë. Prandaj, askush nuk do të guxojë të shkojë deri aty.”
Deklarata e Trump vjen në një kohë tensionesh të rritura për shkak të tarifave të reja ndaj importeve kineze dhe shqetësimeve ndërkombëtare për ndikimin që kjo luftë tregtare mund të ketë mbi ekonominë globale.
