Presidenti i SHBA-ve, Donald Trump, hodhi poshtë karakterizimin e fushatës së Izraelit kundër Hamasit në Rripin e Gazës si një “gjenocid”, duke theksuar se lufta filloi kur Hamasi sulmoi Izraelin më 7 tetor 2023.
I pyetur për akuzën për gjenocid, Trump tha: “Nuk mendoj se është ashtu. Ata janë në luftë”.
Grupet ndërkombëtare akuzojnë Izraelin se nuk lejoi të hynte ndihmë e mjaftueshme për të parandaluar urinë dhe se tregoi shpërfillje për viktimat civile.
“Disa gjëra të tmerrshme ndodhën më 7 tetor”, tha Trump, ndërsa përgatitej të hipte në Air Force One në Allentown të Pensilvanisë. “Ishte një gjë e tmerrshme, e tmerrshme. Një nga më të këqijat që kam parë ndonjëherë”.
I pyetur për një përditësim më të gjerë mbi Gazën, Trump përsëriti se SHBA-të po punojnë për të ushqyer palestinezët në Rrip.
“Ne duam që njerëzit të ushqehen. Ne jemi i vetmi vend që po e bën vërtet këtë. Po japim para për t’i ushqyer njerëzit. Dhe Steve Witkoff po bën një punë të shkëlqyer”.
Trump tha se Washingtoni “po jep disa kontribute mjaft të mëdha, në thelb për të blerë ushqim, në mënyrë që njerëzit të mund të ushqehen”.
“Ne nuk duam që njerëzit të vuajnë nga uria dhe nuk duam që njerëzit të vdesin nga uria. Dhe po ndodhin disa gjëra të këqija”, tha Trump, pa dhënë hollësi.
Shumë vende janë mobilizuar javët e fundit për të shtuar ndihmën ushqimore në Gaza, mes raportimeve për uri masive që rrezikon popullsinë.
