Presidenti amerikan Donald Trump ka reaguar ndaj kërkesës së Iranit për dëmshpërblime për dëmet e shkaktuara gjatë luftës, duke deklaruar se tani edhe Uashingtoni do të kërkojë kompensim nga Teherani. Trump tha se SHBA-ja do të kërkojë pagesë për njerëzit që, sipas tij, Irani ka vrarë dhe plagosur gjatë viteve.
Trump e bëri deklaratën pasi autoritetet iraniane kërkuan dëmshpërblime për dëmet e shkaktuara nga sulmet amerikane dhe izraelite ndaj Iranit. Presidenti amerikan tha se kërkesa e Teheranit është një “ide interesante”, por se Shtetet e Bashkuara do ta përdorin të njëjtin argument për të kërkuar kompensim nga Irani.
Përplasja verbale vjen në një moment kur të dyja palët po diskutojnë edhe çështjen e Ngushticës së Hormuzit. Irani ka lidhur rihapjen e plotë të kësaj rruge strategjike detare me përmbushjen e disa kërkesave nga SHBA-ja, ndërsa Uashingtoni kërkon që Teherani të heqë kufizimet ndaj lundrimit.
