Në një tjetër deklaratë mbi luftën në Ukrainë, presidenti amerikan Donald Trump është përpjekur të distancohet nga konflikti, duke e cilësuar atë si një luftë “qesharake” dhe duke theksuar se nuk është përgjegjësia e tij.
Në një postim në rrjetin social Truth Social, Trump deklaroi se vetëm gjatë muajit korrik janë vrarë rreth 20.000 ushtarë rusë, ndërsa humbjet totale të Rusisë që nga fillimi i vitit shkojnë në 112.500 trupa. Nga ana tjetër, sipas tij, Ukraina ka humbur rreth 8.000 ushtarë, pa përfshirë të zhdukurit dhe viktimat civile.
“Kjo është një luftë që nuk duhej të kishte ndodhur kurrë. Ky është lufta e Biden, jo e ‘Trump-it’. Unë jam këtu vetëm për të parë nëse mund ta ndaloj,” – shkroi ai.
Kjo deklaratë përbën një hap prapa nga premtimet e bujshme të Trump gjatë fushatës elektorale. Në vitin 2023, ai kishte pohuar se mund të ndalonte luftën në vetëm 24 orë pas rikthimit në Shtëpinë e Bardhë, pa sqaruar se si. Madje, në gusht të vitit 2024 kishte shkuar më tej duke thënë:
“Para se të ulem në Zyrën Ovale, sapo të zgjidhem president, do ta kem zgjidhur këtë luftë të tmerrshme.”
Tani, komentet e fundit duken si një përpjekje për të shmangur përgjegjësinë për zhvillimet e konfliktit dhe për të qetësuar pritshmëritë.
Ndërkohë, presidenti rus Vladimir Putin, në një takim me liderin e Bjellorusisë Alexander Lukashenko, tha se negociatat për paqe me Ukrainën mund të vazhdojnë, por bëri të qartë se qëllimet strategjike të Moskës mbeten të pandryshuara.
“Nëse dikush është zhgënjyer nga rezultatet e deritanishme, kjo ndodh për shkak të pritshmërive të tepruara,” – tha Putin, duke shtuar se bisedimet duhet të zhvillohen pa kamera dhe në qetësi.
Putin konfirmoi se forcat ruse po kryejnë sulme në të gjithë vijën e frontit dhe se dinamika e luftës është në favor të Rusisë. Ai përmendi se trupat e tij kanë marrë qytetin Chasiv Yar, pas një beteje 16-mujore, pretendim që është hedhur poshtë nga pala ukrainase, e cila thotë se qyteti nuk është plotësisht nën kontrollin rus.
Këto zhvillime vijnë vetëm pak ditë para përfundimit të afatit që Trump i ka dhënë Rusisë për të arritur një marrëveshje armëpushimi, ndryshe SHBA paralajmëron sanksione të reja, madje edhe ndaj vendeve që vazhdojnë të blejnë energji ruse.
