Presidenti turk Rexhep Tajip Erdogan ka zhvilluar një bisedë telefonike me presidentin amerikan Donald Trump.
Sipas deklaratës së lëshuar nga Drejtoria e Komunikimeve Presidenciale, e cituar nga gazeta NTV, Erdogan shprehu besimin e tij të plotë se Turqia dhe Shtetet e Bashkuara, si dy aleatë, do të avancojnë bashkëpunimin e tyre me solidaritet, orientim drejt rezultateve dhe sinqeritet në këtë periudhë të re.
Presidenti turk deklaroi ndër të tjera se zhvillimet rajonale dhe globale kanë bërë të nevojshme rritjen e konsultimeve midis Turqisë dhe SHBA-ve për të gjitha çështjet.
Erdogan tha se Ankaraja mbështet “iniciativat e menjëhershme dhe vendimtare të Trump për t’i dhënë fund luftës midis Rusisë dhe Ukrainës “.
Sipas deklaratës së presidencës turke, Erdogan i tha Trump gjithashtu se SHBA duhet t’i japë fund sanksioneve të vendosura ndaj Turqisë sipas ligjit CAATSA, të përfundojë procesin e blerjes së avionëve luftarakë F-16 dhe të rikthejë Turqinë në programin luftarak F-35, në mënyrë që të zhvillohet bashkëpunimi midis dy vendeve në industrinë e mbrojtjes.
Erdogan thuhet se deklaroi se Turqia është përpjekur për një paqe të drejtë dhe të qëndrueshme që nga fillimi i luftës në Ukrainë dhe do të vazhdojë ta bëjë këtë.
Më herët, Ministria e Jashtme turke – me rastin e 11 vjetorit të aneksimit të Krimesë nga Moska – theksoi se nuk e njeh pushtimin e gadishullit nga Rusia dhe se mbështet sovranitetin dhe integritetin territorial të Ukrainës.
“Në përvjetorin e aneksimit të Republikës Autonome të Krimesë nga Federata Ruse përmes një referendumi të paligjshëm njëmbëdhjetë vjet më parë sot (16 mars), ne përsërisim se Turqia nuk e njeh situatën në Krime, e cila është një shkelje e ligjit ndërkombëtar dhe mbështet integritetin territorial dhe sovranitetin e Ukrainës”, theksoi Ministria e Jashtme turke.
