Një ngjarje e tmerrshme që tronditi Indinë ka marrë një kthesë të papritur. Policia e shtetit Meghalaya njoftoi se Sonam Raghuvanshi, 25 vjeç, është dorëzuar dhe është vendosur në paraburgim si e dyshuara kryesore për vrasjen e bashkëshortit të saj gjatë muajit të mjaltit. Ky krim brutal ka ngjallur shumë pyetje, ndërkohë që autoritetet janë duke hetuar arsyet që qëndrojnë pas këtij akti tronditës.
Çifti, që ishte martuar më 11 maj në qytetin Indore të Madhya Pradesh-it, kishte zgjedhur shtetin verilindor Meghalaya për udhëtimin e tyre të parë si burrë e grua, për shkak të “lugina të bukura”, sipas familjarëve. Por vetëm katër ditë pas mbërritjes, ata u zhdukën pa lënë gjurmë. Një javë më vonë, trupi i dekompozuar i Rajës, 30 vjeç, u gjet në një grykë, me fytin e prerë dhe sendet personale të vjedhura. Sonam ishte zhdukur dhe u konsiderua nga familjet si viktimë e rrëmbimit apo vrasjes.
Një fushatë masive për ta gjetur atë u zhvillua nga familjarët dhe mbështetësit, të cilët akuzuan autoritetet për neglizhencë dhe kërkuan ndërhyrje federale, madje i shkruan edhe Kryeministrit Narendra Modi për hetim të plotë. Por mëngjesin e së hënës, drejtori i policisë së Meghalaya-s, Idashisha Nongrang, konfirmoi se Sonam ishte dorëzuar në një stacion policie në Uttar Pradesh. Ajo u arrestua menjëherë, ndërsa u ndaluan edhe katër burra të tjerë, të dyshuar si bashkëpunëtorë në krim. Njëri prej tyre, sipas policisë, kishte punuar më parë në zyrën e Sonamit.
Shefi i policisë, Vivek Syiem, e quajti Sonamin “të dyshuarën kryesore” dhe tha se motivi i vrasjes është ende nën hetim. Në një konferencë për shtyp, ai u shpreh se “ka të dhëna që nënkuptojnë një marrëdhënie të mundshme jashtëmartesore” mes saj dhe njërit nga bashkëpunëtorët e dyshuar, por këto do të verifikohen gjatë marrjes në pyetje.
Babai i Sonamit, Devi Singh, ka mohuar kategorikisht përfshirjen e vajzës së tij në krim dhe pretendon se ajo ka shpëtuar nga rrëmbyes të panjohur. “Vajza ime është e pafajshme. Policia e Meghalaya-s po shpik histori,” u shpreh ai, duke kërkuar një hetim federal. Fillimisht edhe familja e viktimës nuk besonte në përfshirjen e nuses, por pas arrestimeve të fundit dhe lidhjeve të dyshuara me të njohur të saj, kanë pranuar që e vërteta mund të jetë më e errët se sa e kishin menduar.
Kryeministri i shtetit Meghalaya, Conrad Sangma, përgëzoi policinë për “përparimin e jashtëzakonshëm” brenda shtatë ditësh. “E vërteta ka dalë në shesh,” u shpreh edhe ministri lokal, Alexander Laloo Hek, i cili tha se autoritetet ishin gjykuar padrejtësisht nga opinioni publik gjatë hetimeve. Ndërkohë, hetimet vijojnë për të sqaruar motivet dhe rolet e secilit të përfshirë në këtë krim që tronditi mbarë vendin.
