Një delegacion i vogël i Real Madridit vizitoi sot stadiumin “Anfield” për të nderuar kujtimin e Diogo Jotës, lojtarit të Liverpoolit që humbi jetën në korrik së bashku me vëllain e tij pas një aksidenti tragjik në Zamora.
Në homazhe morën pjesë Xabi Alonso, Dean Huijsen, Trent Alexander-Arnold dhe Emilio Butragueño. Ata vendosën buqeta me lule te altari i ngritur në nder të futbollistit portugez dhe mbajtën një minutë heshtje.
Trent, i prekur thellë nga humbja e ish-bashkëlojtarit të tij, vendosi një buqetë me lule të kuqe e të bardha, së bashku me një letër dorëshkruar:
“Shoku im Diogo, na mungon shumë, por dashuria për ty mbetet. Kujtimi yt dhe i André-s do të qëndrojë gjithmonë. Buzëqesh sa herë të kujtoj dhe do t’i mbaj përjetë në zemër momentet tona. Më mungon çdo ditë. Me dashuri, Trent dhe familja. Forever 20 YNWA.”
Ndërkohë, Xabi Alonso la një buqetë me lule të bardha në emër të klubit madrilen, me një mesazh zyrtar:
“Real Madrid CF shpreh ngushëllimet më të thella për Liverpool FC dhe familjen e Diogo Jotës. Bota e futbollit vajton humbjen e një personi të jashtëzakonshëm dhe të një lojtari të madh.”
