Sot në orën 11:00, Gjykata e Lartë në Novi Sad do të shpallë vendimin për aktakuzën e ngritur ndaj 13 personave në lidhje me rënien e tendës në stacionin hekurudhor të qytetit më 1 nëntor të vitit të kaluar. Nga ajo ngjarje tragjike humbën jetën 14 persona në vendngjarje, ndërsa tre të tjerë u plagosën rëndë, dy prej të cilëve ndërruan jetë më vonë si pasojë e plagëve.
Aktakuza u ngrit në fund të vitit 2024 nga Prokuroria e Lartë Publike në Novi Sad. Nga të pandehurit, dhjetë ndodhen aktualisht në paraburgim, dy janë në arrest shtëpiak, ndërsa një prej tyre është ish-drejtoresha e përgjithshme e “Infrastrukturës hekurudhore të Serbisë”, Jelena Tanaskovic.
Ish-ministri i Ndërtimit, Goran Vesiq, po mbrohet në gjendje të lirë, pasi gjykata i hoqi masën e paraburgimit pas pranimit të ankesës së mbrojtjes. Sipas aktakuzës, përgjegjës për tragjedinë dyshohen të jenë edhe ish-drejtues të tjerë të lartë të institucioneve shtetërore, përfshirë ushtrues të detyrës së drejtorit të përgjithshëm të “Infrastrukturës hekurudhore të Serbisë” dhe ish-nëndësministrin në Ministrinë e Ndërtimit. Ata akuzohen për vepra penale të rënda kundër sigurisë së përgjithshme, në lidhje me shkaktimin e rrezikut të përgjithshëm.
Në aktakuzë përfshihen gjithashtu edhe emra të tjerë si projektuesit e strukturës, përgjegjës teknikë për ndërtimin, kontrollues të projekteve dhe ekzekutorë të punimeve ndërtimore. Prokuroria i ngarkon ata me përgjegjësi për veprime të pahijshme dhe të papërshtatshme gjatë procesit të ndërtimit të tendës, që përfundoi me pasoja fatale.
Vendimi i gjykatës pritet me interes të lartë nga publiku, ndërsa është lejuar prania e mediave në seancën e sotme.
