Një ditë plazhi në lagunën e Patokut është kthyer në makth për dy adoleshentë 16-vjeçarë nga Kurbin. Rreth orës 15:00 të ditës së sotme, dy të rinjtë kanë hyrë për t’u larë në zonën e kanalit që lidh lagunën me detin, por situata ka marrë fund tragjik për njërin prej tyre.
Njëri nga të miturit është nxjerrë me urgjencë nga uji dhe është dërguar në spital për ndihmë mjekësore, ndërsa shoku i tij rezulton i zhdukur, me dyshime të forta për mbytje.
🔴 Në vendin e ngjarjes ndodhen forca të shumta policie nga Komisariati i Kurbinit, Policia Kufitare si dhe polumbarë të njësisë RENEA, të cilët po zhvillojnë operacion kërkimi për trupin e adoleshentit të zhdukur.
Grupi hetimor ka nisur punën për zbardhjen e rrethanave të plota të ngjarjes, ndërsa familjarët e të miturit ndodhen në gjendje shoku.
A ishte zona e siguruar?
Patoku është një nga destinacionet natyrore më të vizituara në verë, por njëkohësisht mungesa e infrastrukturës dhe e sinjalistikës për rreziqet në zona të caktuara, si kanalet që lidhen me detin, kanë rezultuar fatale në të kaluarën.
Ky është një sinjal alarmi për autoritetet lokale, që shpesh herë janë më të zëshme për festivalet dhe më të heshtura për masat e sigurisë.
