Festimet e mëdha në Mexico City pas fitores së Meksikës ndaj Ekuadorit janë kthyer në tragjedi, pasi tre persona kanë humbur jetën nga asfiksia mes turmave të mëdha.
Sipas BBC, viktimat janë një vajzë 19-vjeçare, një grua 48-vjeçare dhe një burrë 44-vjeçar. Autoritetet shëndetësore të kryeqytetit meksikan konfirmuan se të tre u gjetën pa ndjenja në zona të ndryshme pranë Paseo de la Reforma, përpara se të transportoheshin në spital.
Ngjarja ndodhi pas fitores 2-0 të Meksikës ndaj Ekuadorit, rezultat që i dha kombëtares meksikane suksesin e parë në një ndeshje me eliminim direkt në Kupën e Botës që nga viti 1986.
Më shumë se një milion njerëz dolën në rrugët e Mexico City për të festuar, kryesisht pranë monumentit Angel of Independence, një nga pikat kryesore të grumbullimit në qytet.
Shërbimet e emergjencës u dhanë ndihmën e parë personave të prekur dhe kryen manovra reanimimi, por autoritetet më vonë konfirmuan se të tre kishin ndërruar jetë si pasojë e asfiksisë.
Kryebashkiakja e Mexico City, Clara Brugada, shprehu ngushëllimet për familjet e viktimave dhe premtoi mbështetje në ditët në vijim. Pas konfirmimit të vdekjeve, ajo u bëri thirrje tifozëve të festojnë gjithmonë me përgjegjësi, kujdes dhe empati.
Fitorja e Meksikës solli festime masive si në Estadio Azteca, ashtu edhe në rrugët e kryeqytetit, ku fishekzjarrët vazhduan gjatë edhe pas përfundimit të ndeshjes.
Meksika tashmë kalon mes 16 më të mirave të Botërorit, por festa historike në kryeqytet u zbeh nga kjo ngjarje e rëndë.
