Ish-mesfushori i Real Madridit, Toni Kroos, ka komentuar hapur stilin e lojës së Barcelonës nën drejtimin e trajnerit Hansi Flick, duke e cilësuar ekipin si tërheqës për t’u parë, por edhe të brishtë në momente të caktuara të ndeshjes. Në podcastin e tij Einfach mal Luppen, gjermani analizoi mënyrën se si luan Barça dhe paralajmëroi se stili i tyre mund t’i kushtojë rëndë në ndeshjet e rëndësishme të Champions League.
“Barcelona ka një nga stilet më tërheqës, në mos më tërheqësin në gjithë Evropën, por mendoj se marrin shumë rreziqe,” – u shpreh Kroos. “Në një ditë të keqe të Pedrit, Lamine Yamal apo Raphinës, çdo ekip mund t’i dëmtojë dhe t’i mposhtë. Kështu mund të eliminohen nga Champions League, njësoj siç ndodhi vitin e kaluar me Interin. Nuk them se do ndodhë në një fazë të caktuar, por diku — në të tetat, çerekfinale, gjysmëfinale apo në finale — do hasin një kundërshtar që do t’i nxjerrë jashtë. Në La Liga kjo nuk do ndodhë, sepse janë shumë dominues.”
Kroos theksoi gjithashtu se skuadra e Flick duhet të ndryshojë qasje në minutat e fundit të ndeshjes për shkak të lodhjes së lojtarëve:
“Pas minutës së 75-të, e sheh qartë që të gjithë janë më të lodhur dhe nuk ndryshojnë mënyrën e lojës për të mbyllur hapësirat. Kur je i lodhur dhe vazhdon të luash në të njëjtin stil, bëhet shumë e dukshme sa i ekspozuar je.”
Gjermani, që nuk ka luajtur kundër Barcelonës në epokën e Flick, e pranoi se skuadra katalanase është ndër më të këndshmet për t’u parë, por sipas tij, ajo “paguan çmimin e obsesionit për ta mbajtur topin dhe për të mos ndryshuar stilin në asnjë rrethanë.”
Deklaratat e Kroosit kanë ngjallur diskutime të shumta në Spanjë, veçanërisht për faktin se vijnë nga një ish-lojtar që njeh mirë futbollin e La Ligës dhe rivalitetin historik mes Real Madridit dhe Barcelonës.
