Kjo e hënë është kthyer në makth për transportit hekurudhor në Zvicër pas dy incidenteve të njëpasnjëshme, që ndodhën brenda disa orësh njëri pas tjetrit.
Fillimisht gjatë mbrëmjes së të dielës, shpërtheu një zjarr në stacionin e Lozanës dhe më pas, rreth orës 7 të mëngjesit të së hënës, një tren doli nga shinat në linjën Frutigen-Brig, mes Goppenstein dhe Brig, në kantonin Valais.
Zjarri në stacionin e Lozanës, i cili ndodhi të dielën në mbrëmje rreth orës 20:45, bëri që gjatë gjithë ditës së hënë, 16 shkurt, shërbimi hekurudhor mes Renens dhe Lozanës të kufizohej.
“Hekurudhat Federale Zvicerane (FFS) u rekomandojnë pasagjerëve të shtyjnë çdo udhëtim jo të domosdoshëm mes Lozanës dhe Renens,” thuhet në një komunikatë.
Sipas hetimeve të para, zjarrin që përfshiu “shumë kabllo” e shkaktoi një mjet piroteknik i hedhur nga një tren që transportonte tifozë.
“Punimet për riparimin e kabllove kanë nisur. Për shkak të dëmeve, janë punime shumë komplekse, që kërkojnë nga gjashtë deri në tetë orë për çdo kabllo. Kjo sepse ka 1 mijë lidhje për kabllo dhe kabllot janë djegur, pra shkatërruar plotësisht,” thuhet në komunikatë.
Sa i përket trenit të dalë nga shinat, i cili shkaktoi disa të plagosur, incidenti thuhet se u provokua nga një ortek. Treni ishte nisur nga Spiez, Bernë, rreth orës 6 të mëngjesit. Policia njoftoi se rreth 30 pasagjerë u evakuuan, ndërsa në bord ndodheshin rreth 80 persona.
FFS sqaroi se ndërprerja e linjës Frutigen-Brig do të zgjasë të paktën deri në orën 16 të ditës së nesërme. “Janë të pritshme vonesa dhe anulime,” thuhet në faqen e tyre.
Autoritetet zvicerane raportojnë se rreziku i ortekëve në kantonin Valais është aktualisht në nivelin 4 nga 5, një shkallë e lartë që ndodh rrallë. Transporti i makinave përmes tunelit të Lötschberg vazhdon normalisht, ndërsa rruga për në luginën Lötschental mbetet e hapur.
