Deputeti i PD Gazment Bardhi, pjesë e listës së kandidatëve për qarkun e Fierit, ka reaguar pas takimit në këtë qytet, të kryeministrit Edi Rama.
Në një postim në rrjetet sociale, Bardhi shkruan se objektivat e Edi Ramës janë fiks si premtimet e tij kur erdhi në pushtet.
“Njëlloj si shëndetësia falas, njëlloj si legalizimet falas, njëlloj si subvencionet në bujqësi, njëlloj si ulja e taksave apo rritja e pensioneve”.
Duke iu referuar listës së kadidatëve të PS për zgjedhjet e 11 majit, Bardhi tha se gjatë vizitës disa orëshe, kryeministri Rama harroi t’u shpjegonte qytetarëve të Fierit se “pse iu ka vënë në krye njeriun e dyshuar për miliona euro abuzime, njeriun që është zyrtarisht nën hetim nga SPAK për korrupsion e shpërdorim detyre, Njeriun që arrogancën e ka të vetmen armë të saj”.
“Harroi t’u shpjegojë pse strehoi në listën e kandidatëve të PS “mallrat e importit të Belindës” Ceno Klosin apo Klevis Jahajn të akuzuar më shumë se një herë për korrupsion e abuzim me pushtetin në SPAK”, shkruan deputeti i PD Gazment Bardhi, në mesazhin e tij në facebook.
