Policia e Shtetit ka finalizuar një tjetër fazë të operacionit ndërkombëtar “The Wanted”, për lokalizimin dhe kapjen e personave të shpallur në kërkim ndërkombëtar.
Në Budapest, Hungari, u arrestua me qëllim ekstradimi në Shqipëri, shtetasi shqiptar Auron Hajdini alias Auron Hysaj, 45 vjeç, i dënuar me 5 vite burg për vjedhje me dhunë.
Arrestimi i tij u bë i mundur falë informacionit të siguruar nga Departamenti i Policisë Kriminale dhe shkëmbimit të tij me Policinë hungareze, nëpërmjet Interpol Tiranës.
Ky shtetas ishte shpallur në kërkim ndërkombëtar nga Interpol Tirana, pasi Gjykata e Apelit Tiranë, me vendimin e datës 21.02.2024, e kishte dënuar me 5 vite burgim. Nga ky dënim i kanë mbetur për të vuajtur 2 vite, 11 muaj e 16 ditë.
Ngjarja për të cilën u dënua Hajdini, daton në vitin 2013, kur në bashkëpunim me persona të tjerë, ka dhunuar rojën e një pusi nafte dhe i ka marrë një sasi nafte, një automjet, një armë gjahu, një celular dhe disa dokumente.
Interpol Tirana, në bashkëpunim me autoritetet hungareze, vijon procedurat për ekstradimin e tij drejt Shqipërisë.
