Një tërmet me magnitudë 5.1 i shkallës Rihter u regjistrua pasditen e së mërkurës, më 23 korrik 2025, në zonën perëndimore të ishullit Kreta, Greqi.
Sipas të dhënave zyrtare, lëkundjet u ndjenë në orën 16:26 me orën lokale, me epiqendër rreth 40 kilometra në veriperëndim të qytetit Kíssamos dhe 161 kilometra në perëndim të Irákleionit, kryeqytetit të ishullit. Thellësia e tërmetit ishte 50 kilometra, çka ka ndikuar që të ndjehet në një rreze të gjerë, por me intensitet më të zbutur.
Banorët në bregdetin verior të Kretës dhe në disa pjesë të Greqisë jugore raportuan lëkundje që zgjatën disa sekonda. Nuk ka raportime për dëme materiale apo të lënduar, por autoritetet janë në gatishmëri dhe po vlerësojnë situatën.
Kreta është një zonë e njohur për aktivitet të shtuar sizmik, dhe tërmete të kësaj magnitude nuk janë të pazakonta në rajon.
