Një tentativë e dështuar grabitjeje është regjistruar mëngjesin e kësaj të premteje në qytetin e Shkodrës.
Mësohet se një person me skafandër ka hyrë për të grabitur një argjendari në lagjen “Vasil Shanto”, por ka hasur në kundërpërgjigjen e pronarit, duke bërë që t’ia mbathë para se të tentojë të marrë sende me vlerë prej aty.
“Rreth orës 11:30, në lagjen “Vasil Shanto”, një shtetas ende i paidentifikuar, që qarkullonte me motomjet, ka qëndruar para një argjendarie dhe me skafandër në kokë është futur në argjendari. Pronari i argjendarisë i ka kërkuar që të heqë skafandrën, por ai ka refuzuar dhe është larguar me vrap, duke lënë edhe motomjetin para argjendarisë”, njofton policia.
Po ashtu dyshohet se jashtë ambienteve të saj, ky shtetas i ka drejtuar një armë zjarri pronarit të argjendarisë, në mënyrë që të ndalte hovin e tij për ta kapur.
Sakaq, shërbimet e policisë kanë shkuar menjëherë në vendin e ngjarjes dhe vijojnë kontrollin në zonë për kapjen e grabitësit. Grupi hetimor, nën drejtimin e Prokurorisë, po punon për identifikimin e autorit dhe dokumentimin ligjor të rastit.
