Tek Kombëtarja e Francës kanë nisur pakënaqësitë e para vetëm pak ditë para fillimit të Kupës së Botës.
Sipas L’Équipe, lojtarët nuk janë të kënaqur me numrin e biletave që Federata Franceze e Futbollit ka vendosur t’u japë për Botërorin. Presidenti Philippe Diallo i ka informuar se secili futbollist do të ketë në dispozicion tetë bileta, dy falas dhe gjashtë me pagesë.
Kjo nuk është pritur mirë nga skuadra, pasi lojtarët mendojnë se ky numër është i pamjaftueshëm, duke marrë parasysh familjarët dhe miqtë që do të udhëtojnë drejt Shteteve të Bashkuara për t’i mbështetur.
Një tjetër çështje lidhet me bonuset e pjesëmarrjes në Botëror. Federata ka ulur shpërblimet për shkak të kostove të larta të udhëtimit drejt SHBA-së, por negociatat mes palëve kanë pasur progres në orët e fundit.
Pavarësisht këtyre tensioneve, situata nuk pritet të ndikojë në paraqitjen e Francës në fushë. Lojtarët dhe Federata do të vazhdojnë bisedimet për biletat dhe bonuset, ndërsa skuadra ka marrë pjesë normalisht edhe në aktivitetet promovuese me sponsorët e FFF-së.
