Massimiliano Allegri mund të largohet nga AC Milan në fund të sezonit, pas përkeqësimit të marrëdhënies me këshilltarin e klubit, Zlatan Ibrahimovic.
Sipas Corriere della Sera, situata brenda klubit kuqezi është shumë e tensionuar, me një atmosferë ku duket se palët janë gjithnjë e më larg njëra-tjetrës. Përplasja mes Allegri dhe Ibrahimovic raportohet se ka shpërthyer pas humbjes ndaj Napoli në fillim të prillit, për shkak të një debati lidhur me zgjedhjen e portierit të tretë për sezonin e ardhshëm.
Tensioni mes tyre nuk është diçka krejt e re. Marrëdhënia Allegri-Ibrahimovic ka pasur përplasje edhe në të kaluarën, që nga koha kur suedezi ishte ende futbollist. Tani, megjithatë, situata duket më serioze, pasi trajneri ndihet i izoluar dhe i lodhur nga ndërhyrjet e brendshme në klub.
Allegri raportohet se nuk e ka pritur mirë faktin që Ibrahimovic ka komunikuar drejtpërdrejt me lojtarë si Rafael Leao dhe Youssouf Fofana për t’u dhënë këshilla taktike. Kjo ka shtuar mosbesimin mes palëve, aq sa thuhet se Allegri dhe Ibrahimovic nuk flasin më me njëri-tjetrin.
Përveç tensioneve jashtë fushe, edhe rezultatet nuk po ndihmojnë. AC Milan ka fituar vetëm një nga gjashtë ndeshjet e fundit, duke rrezikuar seriozisht objektivin për kualifikimin në Champions League.
Dy ndeshjet e fundit të Serie A mund të jenë vendimtare për të ardhmen e Allegri. Trajneri ka kontratë deri në vitin 2027, por nëse situata nuk ndryshon, ai mund të vendosë të largohet më herët nga San Siro.
Në rast largimi, Allegri është lidhur edhe me një kalim të mundshëm te kombëtarja e Italisë, ndërsa Ibrahimovic pritet të forcojë pozicionin e tij brenda klubit, me zëra që flasin edhe për një rol të mundshëm të Fabio Paratici si drejtor sportiv.
