Javier Tebas ka reaguar pas deklaratave të Florentino Pérez në konferencën për shtyp. Presidenti i LaLiga iu përgjigj akuzave të kreut të Real Madrid, i cili pretendoi se LaLiga kishte paguar Relevo 25 milionë euro për ta kritikuar atë.
Tebas e mohoi kategorikisht këtë akuzë, duke e quajtur një gënjeshtër të plotë. Ai tha se Florentino Pérez herë përmend një shifër, herë një tjetër, ndërsa shtoi se këto pretendime bazohen te viktimizimi.
“Është gënjeshtër. Herë thotë një shifër, herë një tjetër. Është një gënjeshtër e plotë. Ata ushqehen me viktimizim dhe gënjeshtra”, u shpreh Tebas.
Presidenti i LaLiga shtoi se e respekton atë që Florentino Pérez ka bërë për historinë e Real Madrid, por theksoi se kjo nuk i jep të drejtë të përhapë akuza të pavërteta.
“Unë jam tifoz i Real Madrid, por tani jam në hibernim. Më vjen keq për Real Madrid dhe nuk mund të vazhdosh duke përhapur gënjeshtra”, tha Tebas.
Sa i përket vendimit të Pérez për të thirrur zgjedhje dhe për të mos dhënë dorëheqjen, Tebas nuk deshi të ndërhynte, duke thënë se çdo drejtues e di vetë çfarë bën me klubin e tij dhe se vendimi duhet respektuar.
