Ditën e sotme, kryeministri Edi Rama, së bashku me zëvendëskryministren Belinda Balluku, njëherësh ministre e Infrastrukturës dhe Energjisë, ishin të pranishëm në firmosjen e marrëveshjes mes Ministrisë së Infrastrukturës dhe Energjisë dhe Universitetit Politeknik të Tiranës.
Kjo marrëveshje është një hap për mbështetjen dhe përgatitjen e studentëve përmes praktikave të paguara të punës, me qëllim aftësimin e tyre profesional, si dhe njohjen nga afër në terren me të gjitha proceset e zhvillimit të infrastrukturës.
Ministrja Balluku theksoi se kjo është një mundësi reale për të rinjtë shqiptarë, duke nënvizuar rëndësinë e eksperiencës praktike dhe barazisë gjinore në sektorët e ndërtimit dhe transportit.
Balluku: Këto nuk janë thjesht statistika. Janë histori suksesi që tregojnë se të rinjtë shqiptarë, kur i jepet mundësia, dinë të shkëlqejnë. Jam shumë e lumtur që sot, çelet një tjetër dritare. Marrëveshja që nënshkruajmë sot shënon fillimin e një nisme të re, që këtë radhë lidhet me një tjetër ndërmarrje në Republikën e Shqipërisë. Ka edhe një element tjetër ky bashkëpunim, barazinë gjinore. Kur flisnim me rektorin dhe me përfaqësuesit e Bankës Botërore, ne i treguam se në punën e rëndë ka shumë vajza dhe gra që punojnë. Nga ana tjetër, do të doja të sqaroja pak si do të funksionojë, sepse edhe teknikalitetet janë të rëndësishme.
Në rastin e parë fillojmë në muajin nëntor dhe përfundon në muajin prill. Në rastin e dytë, fillon në muajin mars dhe përfundon në muajin maj. Pjesë integrale e kurrikulës do të jenë vizitat e përjavshme në terren. Mund të uleni në tryeza, të lexoni projekte dhe libra, por vendi që mësoni më shumë janë kantieret. Aty do të mësoni si zhvillohet infrastruktura e vërtetë.
Jemi duke kaluar në një nivel tjetër. Kur unë fillova të drejtoja trafikun ajror, ishte një nga punët më të kërkuara. Sot ne do të zhvillohemi edhe në dy sektorë të njëjtë model, që është ai i trafikut detar dhe të gjithë rrjetin hekurudhor. Sot do të përfitoja nga rasti t’ju thoja edhe një fakt të rëndësishëm.
