Në episodin më të fundit të podcast-it Public Square, ish- ministri për Europën dhe Punët e Jashtme Ditmir Bushati mirëpriti Gabrielius Landsbergis, ish-Ministër i Jashtëm i Lituanisë, për të diskutuar mbi sfidat aktuale të sigurisë në Europë dhe luftën për lirinë përballë agresionit rus.
Me një perspektivë unike nga Baltiku, Landsbergis ndau përvojën e tij si ministër gjatë shpërthimit të luftës në Ukrainë, duke theksuar rëndësinë e reagimit të përbashkët europian dhe angazhimit të qëndrueshëm për mbrojtjen e vlerave demokratike.
Landsbergis theksoi se ambiciet kolonialiste të Vladimir Putinit nuk kanë ndalur dhe se Europa ende nuk është plotësisht e vetëdijshme për rrezikun real që paraqet Rusia, jo vetëm për Ukrainën, por edhe për vetë sigurinë europiane. Ai ngriti shqetësime mbi aftësinë e Perëndimit për t’iu përgjigjur sfidave të reja të sigurisë, veçanërisht në një kohë kur marrëdhënia transatlantike është në provë.
Një pjesë e rëndësishme e diskutimit iu kushtua edhe të ardhmes së zgjerimit të BE-së, ku Landsbergis dha një mesazh të qartë: “Europa duhet të tregojë vullnet dhe vendosmëri reale, duke kaluar nga fjalët në veprime konkrete”
Ai shprehu shqetësimin se procesi i zgjerimit po zvarritet, duke rrezikuar të humbasë ndikimin stabilizues që ka pasur deri më tani në rajon.
Ky episod sjell në vëmendje edhe sfidat globale që lidhen me ndikimin e Kinës, situatën në Tajvan dhe ndryshimet në doktrinën e politikës së jashtme të SHBA-ve.
Me analiza të drejtpërdrejta dhe pa filtra, Landsbergis apelon për një Europë më të fortë, më të bashkuar dhe më të përgjegjshme në mbrojtje të rendit ndërkombëtar dhe të vetë ekzistencës së saj si aktor global.
