Ylli i ri i Barcelonës, Lamine Yamal, ka organizuar një festë tërësisht private në klubin “Luz de Gas” në Barcelonë, në një kohë kur lojtari është ende në rikuperim nga një dëmtim në ijë.
Sipas El Periódico, festa u zhvillua natën mes së enjtes dhe së premtes, më 14 nëntor. Të ftuarit u detyruan të respektonin një rregull të hekurt konfidencialiteti: telefonat celularë duhej të liheshin te hyrja dhe qasja në një nga zonat VIP ishte e rezervuar vetëm për gratë. Brenda ndodheshin Yamal, një i afërm i tij dhe disa miq, përfshirë kushëririn Mohamed Abde. Gratë lejoheshin të hynin në zonën VIP për të shijuar pije dhe biseda me talentin e Barcelonës, ndërsa djemtë qëndronin në zonën kryesore të klubit.
Raportet tregojnë se Yamal ishte i qetë dhe shumë miqësor gjatë gjithë mbrëmjes, duke buzëqeshur, biseduar dhe shijuar atmosferën energjike. Festa erdhi menjëherë pas rikthimit të tij nga grumbullimi me kombëtaren spanjolle.
Grupi i miqve që e shoqëron zakonisht në Luz de Gas u largua rreth orës 03:30, ndërsa Yamal dhe rrethi i tij i ngushtë vazhduan festimet edhe më gjatë.
