Nuk e fshehu zhgënjimin as Armand Duka, kreu i FSHF-së nëë mënyrë diplomatike dhe të moderuar kërkoi një analizë të qetë dhe të detajuar. Dhe në kulmim e diskutimit mbi Kombëtaren dhe trajnerin e saj, brazilianin Sylvinhon, për të ndezur edhe më shumë ambientin ka menduar “Mundo Deportivo”.
E përditshmja spanjole e lidh emrin e trajnerit të Kombëtares shqiptare me një transferim të mundshëm tek Inter Majemit, skuadër ku militojnë yje si Leo Mesi, Suarez, Buskets dhe që është në pronësi të ikonës David Bekam.
Gjithnjë sipas “Mundo Deportivo”, Tata Martino, trajneri aktual i Inter Majemit, pritet të shkarkohet në orët në vijim, ndërsa drejtuesit e klubit amerikan po studiojnë tregun për të gjetur një trajner të ri.
Sipas medias spanjole thuhet se favoriti kryesor për të marrë drejtimin e Inter Majemit është Xavi Hernandes. Xavi është një mik shumë i ngushtë i Leo Mesit dhe pjesës tjetër të ish-lojtarëve të Barcelonës, por ai dhe Sylvinho nuk janë të vetmit kandidatë në këtë listë.
Sipas gazetës “Ole”, mes pretendentëve janë edhe emra si Allegri, Ten Hag apo Lampard. Duke u rikthyer te Sylvinho, kujtojmë që braziliani rinovoi kontratën e tij me FSHF-në edhe me një vit tjetër, pas përfundimit në korrik të këtij viti.
Në përfundim të humbjes me Ukrainën, Sylvinho u pyet nga gazetarët nëse ishte i bindur për vazhdimin në krye të Kombëtares shqiptare edhe në kualifikueset e Botërorit, pyetje të cilave trajneri brazilian iu përgjigj se nuk kishte asnjë lloj dyshimi për të ardhmen e tij:
“Nuk ndryshon asgjë. Kemi bërë kualifikuese të mira, ndërkohë tani një vit më vonë, kemi bërë keq. Duhet të përmirësohemi, kemi vend për t’u rritur dhe me objektivin për Botërorin, që do të ishte çmenduri.
Nuk kam asnjë dyshim që do të vazhdoj. Më vjen keq për rezultatin e fundit, por nuk mund ta hedhim poshtë të gjithën. Për t’u përmirësuar po”,- tha Silvinjo pas ndeshjes së fundit në grup me Ukrainën.
