Arkitektja Orgeta Likaj, e ftuar në “Opinion” në News24, në lidhje me ndërhyrjen në ish-burgun e Spaçit, u shpreh se ishte i tmerrshëm dhe ngjante me një objekt lagjeje.
Sipas arkitektes, nëse vërtet në ndonjë pjesë duhet ndërhyrje për shkak të amortizimit, duhet projekt i detajuar dhe publik, sepse Spaçi është dëshmi që u shërben brezave.
Orgeta Likaj: “Suvatimi është i tmerrshëm, ngjan një objekt lagjeje, nuk të kujton asgjë nga ajo që realisht duhet të kujtojë ajo godinë. Ka disa rryma mendimi kur vjen puna për trashëgiminë dhe mënyra se si duhet të trajtohen objektet e trashëgimisë kulturore. Ka nga ata që mbështesin rrymën romantike, ku thonë që duhet ruajtur e paprekur, për të qenë një dëshmi e gjallë e historisë. Por ka edhe nga ata që preferojnë të bëjnë ndërhyrje rehabilituese.
Në rastin e dytë, nëse vendoset për të ndërhyrë, duhet materiale që mos të qeshësh, bie fjala siç ishte lyerja me të bardhë. Duhet një projekt i detajuar nëse do të ndërhyhet, pasi Spaçi nuk është vetëm i një institucioni. Sepse ata që e kanë jetuar në atë periudhë aty kur marrin nipin për dore nuk kanë çfarë t’i tregojnë.
Me grupet e interesit duhet një diskutim publik, janë dy gjëra, sepse nuk pyetet kush dhe se si duhet bërë. U desh një film aty të marrim vesh që paska një projekt, ku askush nuk di asgjë. Janë bërë filma me famë botërore për Schindler list apo Life is Beautiful, por nuk ka bërë asnjë ndërhyrje në ndërtesat e asaj kohe.
