Pas dështimit të Italisë për t’u kualifikuar në Botërorin 2026 dhe dorëheqjes së presidentit të FIGC-së, Gabriele Gravina, në Itali kanë nisur menjëherë spekulimet për të ardhmen e stolit të kombëtares. Reuters raportoi se Gravina u largua këtë të enjte pas presionit të madh që pasoi eliminimin e Italisë, ndërsa federata do të mbajë zgjedhje më 22 qershor për pasuesin e tij.
Sipas La Gazzetta dello Sport, mes emrave që po përmenden për të marrë drejtimin e Italisë janë Roberto Mancini dhe Antonio Conte, por surpriza më e madhe është përfshirja e Pep Guardiolës në këtë listë. Raportimi thekson se trajneri spanjoll shihet si një kandidat intriguese për një projekt të ri afatgjatë me Azzurrët.
Emri i Guardiolës ka marrë edhe më shumë peshë për shkak të pasigurive rreth të ardhmes së tij te Manchester City. Sipas raportimeve nga Anglia, vetë Guardiola ende nuk ka marrë një vendim përfundimtar nëse do të vazhdojë apo jo me klubin anglez, gjë që ka ushqyer zërat për një aventurë të re në futbollin e kombëtareve.
Për momentin nuk ka asgjë zyrtare, por ideja e një trajneri të huaj në stolin e Italisë po rikthen debat të madh në vend. Ajo që është e qartë është se pas një tjetër zhgënjimi historik, Italia po përgatitet për ndryshime të mëdha dhe emri i Guardiolës tashmë ka hyrë fuqishëm në qarkullim.
