Manchester City u ndal në barazim pa gola 0-0 në transfertë ndaj Sunderland, në një rezultat që mund të ketë peshë të madhe në garën për titull në Premier League. Sunderland, me një paraqitje të disiplinuar dhe me shumë shpirt, arriti të mbajë edhe një tjetër “gjigant” pa fitore, duke e shtuar këtë rezultat në listën e ndeshjeve të mëdha ku ka marrë pikë.
Skuadra vendase u mbrojt mirë, u tregua agresive në duele dhe nuk i la City-t hapësirat e zakonshme për të shfaqur futbollin e vet. Nga ana tjetër, ekipi i Guardiolës pati kontroll më të madh, por i mungoi mprehtësia në momentin final, duke mos arritur të gjejë golin që do t’i jepte tri pikët.
Barazimi i Sunderland vjen si një tjetër sinjal se “Stadium of Light” po kthehet në një fushë të vështirë edhe për ekipet më të forta, sidomos pas atij 2-2 ndaj Arsenalit në fund, që e kishte bërë tashmë bujë në kampionat.
Për City-n, ky 0-0 është një hap fals në një moment ku çdo pikë është vendimtare, ndërsa për Sunderland është një rezultat që rrit besimin dhe e forcon moralin për vazhdimësinë e sezonit.
