Kryetari i bashkisë së Minneapolis në SHBA, Jacob Frey, dhe anëtarët e komunitetit u prononcuan pas ngjarjes tragjike vdekjeprurëse në shkollën katolike, ku dy fëmijë humbën jetën.
Frey bëri thirrje për ndalimin e armëve dhe karikatorëve me kapacitet të lartë, duke kërkuar bashkëpunim shtetëror dhe federal. Një retorikë e tillë gjen mbështetje të gjerë në Minneapolis, ku politika dominohet nga demokratët.
“Ne kemi nevojë për ndalimin në të gjithë shtetin dhe rang federal për karikatorët me kapacitet të lartë,” shton kryetari i bashkisë. “Nuk ka asnjë arsye që dikush të jetë në gjendje të qëllojë 30 herë para se të rimbushë armën” thotë ai, duke shtuar se “nuk po flasim këtu për pushkën e gjuetisë së babait tuaj. Po flasim për armë që janë bërë për të shpuar armaturat dhe për të vrarë njerëz.”
Kryebashkiaku i Mineapolis thotë se një pjesë e problemit është qarkullimi i lirë i armëve të sulmit nga qyteti në qytet – dhe se do të duhet unitet politik midis qyteteve për të trajtuar çështjen. Sulmi ndodhi të mërkurën në mëngjes kur një person qëlloi përmes dritareve të kishës ndërsa njerëzit po luteshin gjatë Meshës – dy fëmijë, të moshës tetë dhe 10 vjeç, u vranë dhe 18 të tjerë u plagosën.
Një fëmijë është ende në gjendje kritike. Autoritetet identifikuan sulmuesin Robin Westman, 23 vjeç, nga periferia e Minneapolis. Ai humbi jetën nga plagët e marra nga arma e zjarrit e shkaktuar nga vetë Westman. Shefi i policisë tha të enjten se ende nuk dihet motivi i ngjarjes, ndërsa FBI po e heton rastin si “një akt terrorizmi dhe krim urrejtjeje që synon katolikët”.
