Një tragjedi e rëndë ka goditur qytetin e Grazit në Austri, ku një sulm me armë zjarri në një shkollë të mesme ka lënë të paktën 10 persona të vdekur, përfshirë autorin e krimit.
Ndër viktimat fatkeqësisht është edhe një vajzë nga Kosova, Lea Ilir Bajrami.
Lidhur me ngjarjen ka reaguar Muhabi Bajrami, familjar i të ndjerës, i cili përmes një postimi në Facebook ka njoftuar për humbjen e mbesës së tij, duke e përshkruar këtë moment si jashtëzakonisht të rëndë për familjen.
“Me zemër të thyer dhe me dhimbje të madhe njoftojmë familjarët, miqtë dhe të afërmit se mbesa jonë, Lea Ilir Bajrami, humbi jetën tragjikisht në sulmin e ndodhur në Graz të Austrisë. Lutemi për shpirtin e saj dhe shprehim falënderime për të gjithë ata që ndajnë dhimbjen tonë në këto çaste të vështira”, shkroi Bajrami.
Ngjarja e rëndë ka tronditur opinionin publik në Austri dhe më gjerë, ndërsa autoritetet atje po vazhdojnë hetimet për zbardhjen e plotë të rastit.
Lajmin për përfshirjen e një shtetaseje kosovare në mesin e viktimave e ka konfirmuar edhe gazetari kosovar Vehbi Haliti, i cili jeton dhe punon në Graz.
Në një prononcim për T7, Haliti tha se vajza ishte bija e një anëtari të kryesisë së Unionit Humanitar në Graz.
“Fatkeqësisht po them se është e saktë. Është një vajzë e një aktivisti tonë këtu në Graz. Është një tragjedi ndër më të mëdhatë në Austri pas Luftës së Dytë Botërore, sa i përket tragjedive të qëllimshme,” deklaroi Haliti, duke shtuar se për arsye privatësie nuk do të publikonte identitetin e viktimës.
Ministri i Brendshëm i Austrisë, Gerhard Karner, konfirmoi se autori i sulmit ishte një 21-vjeçar, ish-nxënës i shkollës, i cili e kishte lënë shkollën pa e përfunduar.
Pas kryerjes së masakrës, ai kreu vetëvrasje në vendin e ngjarjes. Përveç viktimave, 12 persona të tjerë janë plagosur, disa prej tyre në gjendje të rëndë.
Në shenjë zie, kancelari austriak Christian Stocker ka shpallur tre ditë zie kombëtare, ndërsa nesër paradite pritet të mbahet një minutë heshtje në të gjithë vendin.
Lidhur me këtë tragjedi ka reaguar edhe presidentja e Kosovës, Vjosa Osmani.
“Shkollat duhet të jenë vend ku fëmijët ëndërrojnë, mësojnë e rriten, e jo vend i dhunës dhe terrorit,” shkroi ajo.
