Presidenti amerikan Donald Trump ka njoftuar një plan të ri dhe shumë të debatueshëm për të “pezulluar përgjithmonë” emigracionin nga të gjitha vendet e të ashtuquajturës botë e tretë.
Deklarata erdhi një ditë pas një sulmi të armatosur në Washington DC, ku u përfshinë dy pjesëtarë të Gardës Kombëtare, ngjarje që ka nxitur polemika të forta politike.
Në një postim në rrjetet sociale, Trump tha se administrata e tij synon të ndalojë aksesin në çdo përfitim federal për joqytetarët dhe të dëbojë këdo që, sipas tij, nuk përbën një “aset të pastër” për Shtetet e Bashkuara.
Këto masa konsiderohen si një vijimësi e qasjes së tij të ashpër ndaj emigracionit, shoqëruar me retorikë që shpesh e lidh emigracionin me rritjen e kriminalitetit dhe deficitit buxhetor.
Megjithatë, analistë dhe media ndërkombëtare, përfshirë “Reuters”, vënë në pikëpyetje zbatueshmërinë e këtij plani.
Ata kujtojnë se edhe iniciativat e mëparshme të Trump lidhur me emigracionin janë përballur me sfida të mëdha ligjore dhe kundërshtime të forta në Kongres, duke e bërë të paqartë se si mund të realizohet një ndalim i tillë i gjerë.
Ndërsa politika të tilla gjejnë mbështetje tek një pjesë e elektoratit të tij, kritikët argumentojnë se ato rrisin klimën e frikës dhe pasigurisë, veçanërisht tek komunitetet me status të brishtë.
Sipas tyre, kjo mund të jetë edhe një përpjekje për të zhvendosur vëmendjen nga çështje të tjera të ndjeshme politike, duke e përdorur incidentin e fundit në funksion të retorikës anti-emigracion.
Situata aktuale shihet si sinjal i qartë i drejtimit që mund të marrë administrata e ardhshme Trump, e cila duket e vendosur të ashpërsojë më tej politikat dhe tonin ndaj emigracionit.
