Stresi gjatë shtatzënisë mund të ndikojë negativisht në zhvillimin e trurit të fëmijës, por një studim i ri sjell edhe një lajm shprese.
Sipas kërkimeve të publikuara së fundmi, zhvillimi i aftësive të përditshme tek fëmijët në vitet e para të jetës mund të ndihmojë në zbutjen e efekteve të stresit të përjetuar para lindjes.
Studiuesit në Universitetin e Nju Jorkut analizuan fëmijë që kishin qenë të ekspozuar në barkun e nënës ndaj uraganit Sandy në vitin 2012, si një model i stresit prenatal. Ata ndoqën zhvillimin e tyre nga mosha 2 deri në 6 vjeç, duke vlerësuar aftësi si komunikimi, kujdesi për veten dhe sjellja sociale.
Në moshën 8-vjeçare, fëmijët iu nënshtruan skanimeve të trurit. Rezultatet treguan se ata që kishin zhvilluar aftësi të mira përshtatëse shfaqnin aktivitet trunor të ngjashëm me bashkëmoshatarët që nuk kishin qenë të ekspozuar ndaj stresit.
Ndërsa, fëmijët me aftësi më të dobëta përshtatëse kishin aktivitet më të ulët në zonat e trurit që lidhen me emocionet.
Studiuesit theksojnë se vitet e para të jetës janë vendimtare për mënyrën se si truri përballon stresin më vonë.
Megjithëse bëhet fjalë për një studim të vogël dhe nevojiten kërkime të mëtejshme, ekspertët sugjerojnë se investimi në zhvillimin e aftësive të përditshme tek fëmijët mund të jetë një mënyrë efektive për të mbrojtur shëndetin e trurit.
Kjo bëhet edhe më e rëndësishme në një kohë kur fatkeqësitë natyrore dhe stresi i lidhur me to janë në rritje.
