Një studim i ri ka zbuluar se më shumë se 1 milion vdekje në Bashkimin Evropian konsiderohen të evitueshme, duke nxjerrë në pah pabarazitë e mëdha në sistemet shëndetësore mes vendeve anëtare.
Raporti tregon se vdekshmëria e evitueshme është dukshëm më e lartë në Evropën Lindore, krahasuar me rajonet Perëndimore dhe Veriore.
Bullgaria, Rumania dhe Polonia renditen ndër vendet më të prekura. Edhe pse shëndetësia publike në këto shtete ka shënuar përmirësime, faktorë si stili i jetesës, qasja e kufizuar në shërbimet mjekësore dhe kushtet socio-ekonomike vazhdojnë të kontribuojnë në numrin e lartë të vdekjeve të parandaluara.
Sëmundje të zakonshme si diabeti, problemet kardiovaskulare dhe kanceri, nëse diagnostikohen dhe trajtohen në kohë, mund të shmangin fatalitete të shumta.
Në krahasim, vendet e Evropës Perëndimore raportojnë nivele shumë më të ulëta të vdekshmërisë së evitueshme.
Aty, aksesi më i gjerë në trajtime cilësore, investimet e mëdha në parandalim dhe funksionimi më i mirë i sistemeve shëndetësore kontribuojnë në rezultate më të mira dhe standard më të lartë jetese.
Sipas Euronews Health, një pjesë e konsiderueshme e këtyre vdekjeve mund të parandalohet përmes rritjes së aksesit në shërbimet mjekësore, promovimit të stilit të jetesës së shëndetshme dhe edukimit për faktorët e rrezikut.
Ekspertët theksojnë se politikat shëndetësore duhet të fokusohen në përmirësimin e kushteve të jetesës dhe mbështetjen e grupeve më të cenueshme.
Diskutimi mbi vdekjet e evitueshme mbetet një tregues kyç i cilësisë dhe disponueshmërisë së kujdesit shëndetësor në BE.
Reduktimi i këtyre dallimeve konsiderohet thelbësor për të siguruar që çdo qytetar evropian të ketë mundësinë të jetojë një jetë më të gjatë dhe më të shëndetshme.
