Ministrja për Europën dhe Punët e Jashtme, Elisa Spiropali, zhvilloi një takim me ish-Presidentin e Kosovës, Hashim Thaçi, në institucionin e Paraburgimit të Gjykatës Speciale në Hagë. Pas takimit, Spiropali theksoi mbështetje për Thaçin dhe procesin gjyqësor në të cilin ai ndodhet, duke potencuar rëndësinë e sistemit drejtësisë që duhet të prodhojë një drejtësi historike dhe jo padrejtësi.
Ajo përmendi edhe dërgimin e përshëndetjeve dhe mbështetjes për tre luftëtarët e tjerë shqiptarë, Kadri Veseli, Jakup Krasniqi dhe Rexhep Selimi. Spiropali shprehu kënaqësi për gjendjen e mirë të Thaçit, i cili ndjek zhvillimet në Shqipëri dhe Kosovë, me shpresën për përmirësimin e marrëdhënieve mes dy vendeve.
Ministrja theksoi rëndësinë e një procesi të rregullt dhe të drejtë, duke shpresuar që vendimi për të votuar dhomat e specializuara dhe Gjykatën Speciale në Kosovë të respektojë të drejtat e njeriut dhe të çojë drejt një procesi ligjor të rregullt. Ajo ritheksoi se populli i Kosovës luftoi për të mbrojtur shtëpitë dhe jetën e tyre dhe se kjo luftë për liri s’mund të njolloset.
Spiropali kërkoi një ndarje të qartë mes luftës për liri dhe çdo akti tjetër që mund të shikohet si agresion. Ajo theksoi se e vërteta historike dhe sakrificat e popullit shqiptar duhet të ruhen dhe të respektohen. “Jam e bindur se, pas dëshmive dhe një procesi të rregullt ligjor, ne do të shohim drejtësi për luftëtarët dhe Kosovën,” përfundoi ajo.
Takimi vjen në një kohë delikate për Kosovën, dhe mbështetja e Shqipërisë për këtë proces gjyqësor është e rëndësishme për gjithë shqiptarët që besojnë në drejtësinë ndërkombëtare.
