Spanja po përgatitet për një nga ndeshjet më të mëdha të fazës së 16 më të mirave në Kupën e Botës 2026, përballjen ndaj Portugalisë.
Një ditë para sfidës, Rodri Hernández, Mikel Merino dhe Víctor Muñoz folën për mediat, duke theksuar respektin për kundërshtarin, por edhe besimin e madh që ekziston brenda skuadrës spanjolle.
Merino u shpreh se grupi ka besim të palëkundur te cilësitë e veta dhe se fjalët e Unai Simón pas fazës së grupeve kanë shërbyer për ta bashkuar edhe më shumë ekipin.
Rodri, nga ana tjetër, theksoi se Spanja ende nuk e ka treguar versionin e saj më të mirë në këtë Botëror.
“Mund të përmirësohemi shumë më tepër. Në fazën e grupeve duhet të ndërtosh dhe të marrësh rezultate, por tani kanë ardhur ndeshjet me eliminim direkt dhe është momenti të tregojmë më të mirën tonë”, tha ai.
Mesfushori i Manchester Cityt shtoi se Spanja ka besim të plotë në forcën e saj.
“Kemi skuadrën më të mirë dhe mesfushën më të mirë. Portugalia ka lojtarë të mëdhenj dhe një grup shumë të fortë, por shpresojmë të tregojmë se jemi më të mirë”, deklaroi Rodri.
Një nga emrat më të komentuar para ndeshjes është Cristiano Ronaldo. Lojtarët spanjollë treguan respekt maksimal për kapitenin portugez, por theksuan se Portugalia nuk është vetëm Ronaldo.
“Ai është një legjendë e këtij sporti dhe një nga lojtarët më të mirë në histori. Është rishpikur ndër vite dhe mbetet gjithmonë i rrezikshëm në zonë”, u shpreh Merino.
Rodri pranoi se Cristiano është shumë i rrezikshëm brenda zonës, por paralajmëroi se Portugalia ka edhe shumë lojtarë të tjerë që mund të bëjnë diferencën, sidomos në mesfushë.
Spanja e di se përballja do të vendoset nga detajet. Rodri kujtoi finalen e Nations League 2025, ku Portugalia fitoi me penallti, dhe theksoi se këtë herë intensiteti pa top dhe rikuperimi i shpejtë do të jenë vendimtarë.
Edhe Merino vuri theksin te beteja në mesfushë, duke thënë se Spanja duhet të qëndrojë besnike ndaj stilit të saj dhe të mos humbasë identitetin në një ndeshje kaq të rëndësishme.
Lajme të mira ka edhe nga gjendja fizike e lojtarëve. Rodri dhe Merino konfirmuan se janë në formë të plotë, ndërsa Víctor Muñoz, i cili kishte pasur probleme në fillim të turneut, deklaroi se ndihet gjithnjë e më mirë dhe është gati të ndihmojë skuadrën.
Merino foli edhe për Lamine Yamal, duke e cilësuar si një futbollist elitar pavarësisht moshës së re.
“Ai ka treguar cilësinë e tij si me kombëtaren, ashtu edhe me klubin. Është shumë ambicioz dhe unë ndaj të njëjtin mentalitet: duhet të besojmë se mund ta fitojmë Botërorin”, tha ai.
Me këtë besim, Spanja shkon drejt duelit të madh ndaj Portugalisë, me synimin për të kaluar në çerekfinale dhe për të vazhduar ëndrrën drejt trofeut botëror.
