Kombëtarja e Spanjës po përgatitet për Kupën e Botës, por jo të gjithë lojtarët shkojnë në turne me të ardhmen e qartë. Sipas raportimeve, 9 nga 26 futbollistët e grumbulluar kanë çështje të hapura në merkato ose kontrata që duhen zgjidhur.
Në Media Day të zhvilluar në Las Rozas, merkatoja nuk ishte tema kryesore, por u bë pjesë e diskutimeve. Emra si Rodri, Pedro Porro, Grimaldo, Cucurella, Fabián Ruiz, Ferran Torres, Oyarzabal, Pubill dhe Marcos Llorente janë në situata të ndryshme, mes rinovimeve, interesimeve dhe pasigurive për të ardhmen.
Rodri, i lidhur së fundmi me Real Madrid, u tregua i qartë se për momentin fokusi i tij është vetëm Botërori. “Tani është Kupa e Botës. Më pas do të shohim”, u shpreh mesfushori, duke theksuar rolin e tij si kapiten dhe përgjegjësinë për të udhëhequr Spanjën drejt suksesit.
Edhe Pedro Porro është një nga emrat që mund të lëvizë në merkato. Manchester City ka nisur kontaktet për mbrojtësin e Tottenham, ndërsa klubi londinez duhet të bëjë një përpjekje të madhe për ta bindur të rinovojë.
Nga ana tjetër, Grimaldo e ka bërë të qartë dëshirën e tij për t’u rikthyer në La Liga. Mbrojtësi ka deklaruar se dëshiron të luajë për një klub të madh në Spanjë, ndërsa më parë është lidhur edhe me Atlético Madrid.
Situata të hapura ka edhe për Fabián Ruiz dhe Ferran Torres. PSG po punon prej muajsh për rinovimin e Fabián, ndërsa e ardhmja e Ferran te Barcelona mbetet ende e paqartë, sidomos me emrin e tij që është përmendur në skenarë të ndryshëm merkatoje.
Megjithatë, te Spanja synimi mbetet i qartë: të lënë zërat e merkatos mënjanë dhe të përqendrohen te Botërori. Luis de la Fuente kërkon që skuadra të ruajë qetësinë dhe të fokusohet vetëm te objektivi madhor.
