Luciano Spalletti ka folur me tone të larta vlerësimi për Jose Mourinhon në prag të ndeshjes së ditës së 7-të të fazës së kampionatit në Ligën e Kampionëve, ku Juventusi përballet me Benficën. Trajneri italian theksoi se kur Mourinho është në skenë, “volumi rritet”, dhe e quajti krenari faktin që do të jetë përballë tij në pankinën tjetër.
Spalletti zbuloi se mes tyre ka pasur komunikime të shpeshta ndër vite: “Kemi pasur një shkëmbim të parë, ku ai zakonisht fiton në këto gjëra. Pastaj u vlerësuam dhe u respektuam, dhe kemi folur disa herë edhe në telefon.” Ai shtoi se kohët e fundit nuk kanë kontakt, por do të jetë kënaqësi të takohen sërish.
Sa i përket ndeshjes, Spalletti pret një Benfica agresive dhe të gatshme të luajë: “Ndoshta do të provojnë ndonjë ‘marifet’ të trajnerit të tyre, por pastaj do të duhet të shfaqin identitetin e tyre. Jam i bindur që do të jetë një ndeshje e mirë.”
Për merkaton, trajneri i Juventusit u tregua i rezervuar dhe ironik, duke lënë të kuptohet se brenda klubit komunikimi është i përditshëm: “Chiellini është këtu, Modesto është këtu, Ottolini është këtu, Comolli ishte në stërvitje këtë mëngjes… Po mendonim edhe të ktheheshim në të njëjtën ndërtesë që të shihemi më shpesh: vetëm natën s’shihemi.” Megjithatë, ai sqaroi se vendimet i takojnë drejtuesve: “Unë kam një punë tjetër. Nuk pres asgjë. Nëse më pyesin çfarë mendoj, ua them, por vazhdojmë me qetësi dhe besim me lojtarët që kam.”
Edhe për rinovimin e kontratës, Spalletti e uli “topin”: “Nuk jam gati për asgjë, dhe as Juventusi,” tha ai, duke shtuar se nuk ka bërë ende asgjë për të merituar atë që pritet: “Në futboll idetë ndryshojnë shpejt. Në fund do bëjmë bilancin dhe do e sqarojmë këtë dilemë në javën e fundit.”
